Sinisiguro ng Malakanyang na walang malalagpasan o walang magiging “loopholes” sa preparasyon sa gaganaping Asia Pacific Economic Cooperation (APEC) leaders meeting na dadaluhan ng mga world leaders simula sa November 18 hanggang 20.
Sinabi ni Presidential Communications Secretary Sonny Coloma na mahigpit ang direktiba ni Pangulong Aquino sa ipinatawag na emergency meeting ng security cluster noong Sabado sa bahay pangarap na itodo ang security preparations para sa APEC summit .
Personal aniyang tututukan ng pangulo ang lahat ng aspeto ng paghahanda partikular ang pagtiyak sa kaligtasan at katiwasayan ng publiko at mga dadalong lider kasama na ang libo libong delegado mula sa iba’t ibang bansa.
Sinabi ni Coloma na nais ni Pangulong Aquino na maging panatag ang kalooban ng mamamayan gayondin ang mga bisitang dayuhan sa kabila ng banta ng mga terorista na may kasunod pa ang ginawa nilang pag-atake sa Paris, France.
By: Aileen Taliping (patrol 23)
