Nakahanda na ang lahat para sa gagawing paghahatid kay Cebu Archbishop Emeritus Ricardo Cardinal Vidal sa kanyang huling hantungan ngayong araw.
Pangungunahan ni Cebu Archbishop Jose Palma ang i-aalay na misa sa Cebu Metropolitan Cathedral mamayang alas-9:00 ng umaga.
Ngunit paglilinaw ni Msgr. Joseph Tan, tagapagsalita ng Archdiocese of Cebu na hindi maaaring pumasok ang lahat ng dadalo sa loob ng simbahan at maglalagay na lamang sila ng malaking TV screen sa labas.
Pagkatapos ng misa ay magkakaroon ng prusisyon kung saan ililibot ang kabaong ng Cardinal sakay ng isang century old caro upang masilayan ng mga taong nag-aabang sa daan.
Pagkatapos ng prusisyon ay ihihimlay na ang mga labi ni Cardinal Vidal sa musuleum sa likod ng Cebu Metropolitan Cathedral kung saan nakalibing si Cebu Archbishop Emeritus Julio Cardinal Rosales.
Nakahanda na rin ang Cebu City Police Office na magbigay seguridad para sa lahat ng dadalo sa libing ngayong araw.
—-
