Umaasa ang kampo ni dating Senador Bongbong Marcos na makapagtatakda na ang Korte Suprema ng araw kung kailan sisimulan ang manual recount at judicial revision ng kanilang mga pinoprotestang balota.
Ito ay kaugnay ng isasagawang preliminary conference ng Korte Suprema na tumatayo bilang PET o Presidential Electoral Tribunal sa election protests ni Marcos laban kay Vice President Leni Robredo.
Ayon kay Atty. Vic Rodriguez, tagapagsalita ng Pamilya Marcos, mahalagang matuloy ang preliminary conference para sa pag-usad ng nasabing petisyon at makapaglatag na ng ebidensya at testigo.
“Kaya po napakahalaga po ng araw na ito na matuloy ang preliminary conference at lagyan na ng araw kung kailan yung manual recount and judicial revision.”
“Bakit ho kanyo? Sapagkat ho kami ay humihingi rin na magkaroon ng 100 division committees.”
“Pagka sa 100 division committees magkakaroon po ng dalawang balota kada araw kaya po nating tapusin yung manual recount and judicial revision in 180 days.”
Krista De Dios | Karambola Program (Interview)
