Determinado ang Kamara na hanapan ng pondo ang libreng tuition para sa kolehiyo.
Ipinabatid ito ni House Appropriations Committee Chair Karlo Alexei Nograles sa gitna na rin aniya nang paghihintay nila sa eksaktong pondo para rito.
Sinabi ni Nograles na tiwala silang matutukoy na kung magkano ang pondong kakailanganin para sa libreng matrikula bago pa man maipasa sa senado ang 2018 National Budget.
Matatandaang sinabi ni Senate Committee on Ways and Means Chairman Sonny Angara na maaaring pagkunan ng pondo para sa free college tuition ang kikitain ng gobyerno sakaling maisabatas na ang isinusulong na tax reform program.
Paliwanag ng senador, P134-B ang inaasahang makokolekta ng pamahalaan sa unang taon ng pagpapatupad ng tax reform law sakaling maging batas kaya’t kakayanin nitong tustusan ang P20-B pondo para sa free college tuition.