Inaasahang tutulak patungong Bangladesh anumang araw ngayong linggong ito ang isang grupo mula sa Federal Bureau of Investigation o FBI ng Estados Unidos.
Ito’y para bisitahin ang Criminal Investigation Department ng Bangladesh makaraan magpasaklolo ito sa kanila.
Ayon kay Bangladeshi Interior Minister Asaduzzaman Khan, hiningi nila ang tulong ng Amerika para matunton kung sino ang nasa likod ng pangha-hack sa computer system ng kanilang Central Bank.
Una nang napa-ulat na tinangkang nakawin ng mga hindi pa nakikilalang hackers ang mahigit 900 milyong dolyar ngunit naharang ito.
Ang tanging nakalusot lamang ay ang 81 milyong dolyar na nailipat sa RCBC Jupiter Branch sa Makati City na itnuturing ngayon bilang pinakamalaking cyber anomaly sa kasaysayan.
Cybercrime expert
Samantala, isang cybercrime expert ang nawawala matapos makipag-usap sa mga pulis at media hinggil sa tangkang pagnanakaw ng mga hacker ng 951 million dollar mula sa Central Bank of Bangladesh.
Kinilala ang cybercrime expert na si Tanveer Hassan Zoha na sinasabing dinukot ng ilang hindi pa nakikilalang suspek at isinakay sa tricycle.
Ayon kay Kamrun Nahar Chowdhury, asawa ni Tanveer, bago dukutin ay naka-usap pa ng kanyang mister ang ilang miyembro ng isang special police force sa Central Bank.
Matapos nito ay inamin din ni Tanveer na tatlo sa mga user ID na ginamit sa cyber theft ay kanyang nalalaman.
Kumbinsido naman si Kamrun na may kaugnayan sa ninakaw na 81 million dollar account ng Central Bank of Bangladesh sa Federal Reserve of New York ang pagdukot sa kanyang asawa.
By Jaymark Dagala | Drew Nacino