Humingi na ng paumanhin si Davao City Mayor Rodrigo Duterte sa lahat ng mga Pinoy na nasaktan sa kanyang pahayag tungkol sa isang gang rape victim.
Ngunit, ayon kay Duterte, ang paghingi niya ng ‘sorry’ na ito ay hindi para sa isang partikular na grupo o tao.
Paliwanag ng alkalde, hindi dapat seryosohin ang kanyang pahayag dahil nang isiwalat niya ito ay galit siya ng mga oras na iyon at hindi naman umano alam ng mga kritiko ang tunay na kwento.
Sinabi ni Duterte na tatanggapin niya kung hindi siya iboboto ng mga kritiko bunga lamang ng ‘gutter language’.
Matatandaan na noong August 13, 1989, pinangunahan ni Felipe Pugoy ang ‘Wild Boys of Dapecol’ sa pangho-hostage sa Camp Domingo Leonor kung saan kabilang si Australian Lay Missioner Jaqueline Hamill.
Bilang main negotiator, in-offer ni Duterte ang kanyang sarili kapalit ng mga prison guards na ginawang hostage ng grupo ni Pugoy kung saan lingid sa kaalaman ng mga ito ay may mga awtoridad nang naghihintay sa city hall.
Dahil dito, naaresto ang mga hostage-taker at nagkabakbakan kaya’t nadamay si Hamill.
Bahagi ng pahayag ni Davao City Mayor Rodrigo Duterte
Digong’s joke
Nalagay sa hotseat at kaliwa’t kanang batikos si presidential candidate at Davao City Mayor Rodrigo Duterte.
Ito’y makaraang kumalat sa social media ang isang video kung saan, ginawa umanong katawa-tawa ng alkalde ang isang insidente ng panggagahasa at pagpatay sa isang binihag na misyonaryong Australiano sa Davao City noong 1989.
Sa post ng nagpakilalang beatboxer ng Pinas sa Youtube, ikinuwento umano ni Duterte ang nangyaring hostage taking sa 17 misyunaryo kabilang na ang ginahasang si Jaqueline Hamill na isa rin sa mga pinaslang ng mga hostage taker.
Nakasaad sa video ang pahayag ng alkalde na nanghihinayang sa ginawang panggagahasa sa nasabing bihag dahil naunahan umano siya ng mga suspek.
Kitang-kita rin sa video ang tila tawanan ng mga nakikinig habang ikinukuwento ng alkalde ang kanyang naging karanasan sa insidente.
By Jelbert Perdez | Jaymark Dagala
