Nagluluksa ang showbiz industry sa pagpanaw ni box-office director Wenn Deramas dahil sa cardiac arrest sa edad na 49.
Ayon kay June Rufino, kaibigan ni Deramas, nagtungo sa Capitol Medical Center ang direktor sa Quezon City kaninang alas-2:00 ng madaling araw para dalawin ang kapatid na isinugod sa ospital.
Pero, pumanaw ang kapatid ni Deramas.
Noong mga sandaling iyon, inatake naman ang direktor.
Tinangka ng mga doktor na i-revive si Deramas subalit binawian na ito ng buhay.
Nabatid na inatake rin ito sa puso dalawang taon na ang nakararaan at sumailalim pa sa angioplasty noong 2015.
Ang mga labi ni Direk Wenn ay nakatakdang dalhin sa Arlington Memorial Chapels sa Araneta Avenue ngayong araw.
Isa lamang sa pinakahuling pelikula ni Deramas ay ang “Beauty and Bestie” na kasali sa Metro Manila Film Festival o MMFF noong Disyembre na pinagbibidahan nina Coco Martin at Vice Ganda.
By Meann Tanbio