Inalmahan ni Foreign Affairs Secretary Alan Peter Cayetano ang naging pahayag ni United Nations High Commissioner on Human Rights Zeid Ra’ad Al Hussein na kailangan nang magpa-psyciatric evaluation ni Pangulong Rodrigo Duterte.
Ayon kay Cayetano, iresponsable at nagpapakita ng kawalang galang ang naging pahayag ni Zeid na isa aniyang paninira sa reputasyon ng Pangulo ng Republika ng Pilipinas.
Iginiit pa ni Cayetano na ang komento Zeid ay hindi lamang isang kahihiyan sa pinuno ng bansa kundi nakasisira rin sa reputasyon ng Office of the High Commissioner.
Nag-ugat naman ang pahayag ni Zeid sa mga banat ni Pangulong Duterte laban sa ilang UN officials na pumupuna sa kampanya kontra iligal na droga ng pamahalaan.
Ayon kay Zeid, hindi nila mapapalampas ang mga pag-atake ni Pangulong Rodrigo Duterte kay UN Special Rapporteur on Extrajudicial Killings Agnes Callamard na binantaan pa nitong sasampalin.
—-
