Humihingi ng saklolo kay Pangulong Ferdinand Marcos Jr. ang Nexus Riders Alliance upang muling pag-aralan ang ipatutupad na rider allocation o capping system at ang pagbabawal sa multi-apping na maaaring makaapekto sa kabuhayan ng libo-libong motorcycle taxi rider.
Ayon kay Alliance Chairman Renato Embiado, hindi lamang ang mga rider ang maaapektuhan kundi maging ang kanilang mga pamilya. Aniya, marami sa kanila ang mga ama, ina, at breadwinner na umaasa sa pagmomotor bilang pangunahing pinagkukunan ng kita.
Iginiit ng grupo na hindi malinaw kung ano ang mangyayari sa mga rider na hindi maisasama sa itinakdang allocation ng bawat platform. Hiniling din nila na muling pag-aralan ang pagbabawal sa multi-apping upang hindi mawalan ng pagkakataong kumita ang mga rider.
Binigyang-diin ni Embiado na hindi sila tutol sa regulasyon, ngunit nais nilang makabuo ng mga patakarang bunga ng konsultasyon sa mga rider upang mapangalagaan ang kanilang kabuhayan. | via Jopel Pelenio (Patrol 17)
