Nagsalita na si dating Interior Secretary Mar Roxas kaugnay sa pagdadawit sa kanya sa illegal drugs operation sa Visayas partikular sa Iloilo ng isa umanong bagman ng napatay na druglord na si Melvin Odicta.
Ayon kay Roxas, umaasa siyang gagawin ni Justice Secretary Vitaliano Aguirre ang tungkulin nito sa tama at patas na paraan.
Ito’y upang magkaalaman at lumabas na anya ang katotohanan na imbento lamang akusasyon laban sa kanya at kay Senate Minority Floorleader Franklin Drilon na sangkot din umano sa sindikato ng iligal na droga sa Iloilo.
Iginiit ni Roxas na dapat tingnan na ang kaduda-dudang affidavit na pinagmulan ng alegasyon laban sa kanila ni Drilon na ibinatay sa double hearsay mula sa taong patay na.
Tinatawag din ng dating presidential candidate na kakatwa at hindi kapani-paniwala ang paratang laban sa kanila.
