Pinaalalahanan ng Joint Task Force COVID-19 Shield ang lahat ng mga police unit commanders na mahigpit pa ring ipatupad ang smoking ban sa lahat ng mga terminal ng pampublikong sasakyan.
Ginawa ni Task Force Commander P/Ltg. Guillermo Eleazar ang pahayag kasunod ng ginawang pagpapasara ng pamunuan ng Ninoy Aquino International Airport (NAIA) sa kanilang designated smoking areas bilang pag-iingat na rin sa COVID-19.
Ayon kay Eleazar, maliban dito ay may mga natatanggap din silang reklamo hinggil sa mga tila nakalilimot na may umiiral na smoking ban sa bansa kahit pa may umiiral na pandemya.
Partikular niyang tinukoy ang mga naninigarilyo sa mga terminal ng bus, jeepney at tricycle lalong partikular na sa mga lalawigan na salig sa Executive Order 26 ni Pangulong Rodrigo Duterte ay mahigpit na ipinagbabawal.
Mismong ang Department of Health (DOH) na aniya ang nagsabing bantad ang mga naninigarilyo sa COVID-19 at mapanganib din ang mga upos ng sigarilyo na maging dahilan ng pagkalat ng virus.