Nakatakdang magtungo sa Taiwan ang mga hepe ng PNP Criminal Investigation Detection Group at Drug Enforcement Group para asikasuhin ang deportation ng puganteng si Ozamiz City Councilor Ricardo Ardot Parojinog.
Ayon kay PNP Chief Director General Osca Albayalde, nakikipag ugnayan na sina CIDG Chief Director Roel Obusan at PDEG Director Chief Supt Albert Ignatius Ferro para mas mabilis na mapauwi sa bansa ang kapatid ng napatay na si Ozamis City Mayor Reynaldo Parojinog.
Posible kasing abutin pa ng isa hanggang dalawang buwan sa Taiwan si Ardot dahil sa mga kinaharap nitong kaso duon na may kaugnayan sa pamemeke ng ID at illegal na pagpasok sa naturang bansa.
Samantala, tinutugis na ng PNP ang mga personalidad na tumulong kay Ardot para makalabas sa bansa.
Ayon kay Director Obusan, batid na nila kung paano nakaalis ng bansa si Ardot ngunit hindi muna nila ilalabas ang iba pang detalye upang hindi ito makaapekto sa kanilang isinasagawang imbestigasyon.
