Pasok na rin ang Commission on Human Rights o CHR sa Mandaluyong City shooting incident kung saan nasawi ang dalawa (2) katao at sugatan ang dalawang iba pa.
Sinimulan na nila nitong Biyernes, Disyembre 29, ayon kay CHR Spokesperson Jacqueline De Guia ang imbestigasyon sa naturang insidente na isang mistaken identity.
Sinabi ni De Guia na bahagi ng imbestigasyon ang ocular inspection at pangangalap ng mga report mula sa ibang ahensya.
Posible din aniya silang magsagawa ng clarificatory hearing kung saan maaaring ipatawag ang mga dawit sa naturang pamamaril.
Matapos ang imbestigasyon ay magrerekomenda ang CHR sa Department of Justice o DOJ kung sino ang mga dapat managot sa nasabing krimen.
Matatandaang sinibak na ang hepe ng Mandaluyong City police at sampung (10) tauhan nito matapos ang nangyaring pamamaril.
Ayon kay NCRPO chief director Oscar Albayalde, kasama sa sinibak at iimbestigahan ang Mandaluyong City police commander na si Senior Superintendent Moises Villaceran dahil sa command responsibility.