SPORTS

Natalo ang Philippine Men’s National Football Team sa Myanmar sa scores na 4-1, sa pagbubukas ng kampanya nito sa ASEAN Championship–Hyundai Cup kahapon sa New Clark City Stadium sa Tarlac City.

Maagang nakalamang ang Myanmar matapos makaiskor sina Kyaw Min Oo sa ikapitong minuto ng laro, habang sa 28-minutes sumipa si Than paing upang dalhin sa 2-0 ang bentahe sa halftime.

Nakapuntos naman ang Pilipinas sa second quarter sa pamamagitan ni Jarvey Gayoso, pero muling umarangkada ang Myanmar matapos makaiskor sina Win Naing Tun sa 81 minutes at Than Paing sa 83 minutes upang selyuhan ang 4-1 na panalo.

Sunod na haharapin ng Pilipinas ang Laos sa Sabado, August 1 sa Vientiane, Laos bago bumalik sa pilipinas para makaharap ang Thailand sa August 4 sa pagpapatuloy ng torneo.   l mula sa panulat ni Jordan Gutierrez

Kinumpirma ng Samahang Basketbol ng Pilipinas na hindi makakasama sina Gilas Pilipinas Mainstays Dwight Ramos at Aj Edu sa 20th Asian Games sa Japan dahil sa commitments sa kani-kanilang teams sa B.League para sa 2026-2027 season.

Ayon kay SBP Executive Director Erika Dy, lalahok ang dalawa sa B.League Manila Games na gaganapin sa September 9 at 10, kasabay ng pagsisimula ng Men’s Basketball Tournament sa Asiad.

Maglalaro si Ramos para sa Levanga Hokkaido, habang sasabak naman si Edu para sa Gumma Crane Thunders.

Nakatakda ang Men’s Basketball Competition ng Asian Games mula September 9 hanggang 20, kung saan idedepensa ng Gilas Pilipinas ang gintong medalya na napanalunan matapos talunin ang Jordan sa Hangzhou games noong 2023.

Samantala, kinumpirma ni Dy na nakapagsumite na ang SBP ng shortlist ng mga manlalarong pagpipilian para sa final 12, pero nilinaw niyang maaari pang mabago ang naturang listahan bago ang pagsisimula ng torneo.   l mula sa panulat ni Jordan Gutierrez

Pasok na si Filipina tennis sensation Alex Eala sa ikalawang round ng Mubadala DC Open matapos talunin si dating WTA World number 4 Zheng Qinwen ng China sa scores na 4-6, 6-4, 6-1.

Nabawi ni world number 28 Eala ang pagkatalo sa unang set laban sa 2024 Paris Olympics Gold Medalist Qinwen upang makuha ang panalo sa loob ng tatlong set.

Sa deciding set, tuluyang nangibabaw ang pinay netter matapos umabante sa 4-0 at tinapos ang laban sa dominanteng score na 6-1.

Sa round of 16, makakaharap ni Eala ang defending champion na si World Number 34 Leylah Fernandez ng Canada sa inaabangang susunod na yugto ng torneo. l mula sa panulat ni Jordan Gutierrez

Diretso na sa second round ng WTA National Bank Open sa Toronto si Filipina tennis sensation Alex Eala matapos masungkit ang first-round bye ng torneo na gaganapin mula august 2 hanggang August 13.

Kabilang si  WTA World number 28 sa mga seeded players na hindi na kailangang maglaro sa opening round at hihintayin na lamang ni eala ang kanyang susunod na katunggali sa kompetisyon.

Tumanggap din ng first-round bye ang world number 1 na si Aryna Sabalenka, pati sina Iga Swiatek, Elena Rybakina, Mirra Andreeva, at Jessica Pegula.

Bago ang torneo sa Toronto, sasabak muna si Eala sa Mubadala DC Open kung saan makakaharap niya sa unang round si reigning olympic gold medalist Zheng Qinwen. | mula sa panulat ni Jordan Gutierrez

Magsasagawa ang Japan B.League ng dalawang pre-season games sa pagitan ng Levanga Hokkaido at Gunma Crane Thunders sa Maynila sa Setyembre 9 at 10.

Kabilang din sa lineup ng mga manlalaro ang dalawang Pilipinong basketbolista: si Dwight Ramos na maglalaro para sa Levanga; at si AJ Edu naman para sa Gunma.

Ayon kay B.League Executive Officer Nao Okamoto, ang Pilipinas ang kauna-unahang bansa kung saan isasagawa ang overseas pre-season games ng naturang liga.

Dagdag pa ni Okamoto, nais iparamdam ng liga sa mga Filipino basketball fans kung paano isinasagawa sa Japan ang mga basketball games.

Samantala, excited din si Ramos na ipadama sa kanyang mga kapwa manlalaro sa B.League ang mainit na pagtanggap ng mga Pilipino sa larong basketball. | Sa panulat ni Anjo Riñon

Inaasahang mahihirapan ang mga pambato ng Pilipinas sa football matapos ang isinagawang group stage assignment draw sa 2026 Asian Games na magaganap sa Japan ngayong Setyembre.

Napabilang ang Philippine Women’s Football Team sa Group G, kung saan makakasama nila ang China, Uzbekistan, at Hong Kong.

Bagama’t naka-secure ang Filipinas ng ticket sa 2027 FIFA Women’s World Cup, hindi pa rin ito magiging madali para sa koponan sa ikalawang pagkakataon na lalahok ito sa naturang kompetisyon.

Kaugnay nito, napasama naman sa Group C ang Men’s U23 Team, kung saan makakaharap nila ang Vietnam, Uzbekistan, at Kuwait.

Magtatagal ang Asian Games Men’s U23 Tournament mula Setyembre 15 hanggang Oktubre 3; habang mula Setyembre 14 hanggang Oktubre 2 naman sa Women’s Division. | Sa panulat ni Reigne Marron (DWIZ OJT)

Bigong nasungkit ng alas Pilipinas men ang kampeonato sa first leg ng 2026  SEA V Cup Men’s Volleyball nitong nakaraang Linggo.

Gayunman, inaasahan ngayong araw, July 23, na muling makasagupa ng Alas men ang Cambodia na gaganapin mamayang alas-siyete ng gabi sa Jakarta International Velodrome sa Indonesia.

Bagamat hindi nanangako ang Italian coach ng Alas men na si Angiolino Frigoni na masungkit ang tropeyo, malaki naman ang tiwala niyang haharapin ito ng koponan nang buong puso.

Matatandaang nagtapos ang kopononan sa ika-limang pwesto ng naturang kompetisyon matapos talunin sa isang dikit at mainit na laban kontra Myanmar na nagwakas sa iskor na 3-0, ngunit hindi ito naging sapat upang makapasok sa finals. | sa panulat ni Reigne Charlene Marron.

Nakakuha ng silver medal si Filipino pole vaulter EJ Obiena sa kakatapos lamang na 2026 Meeting Madrid sa España kaninang madaling araw, oras sa Pilipinas.

Nakatalon si Obiena sa 5.85-meter level sa naturang torneo, na nagsilbi ring best performance niya sa 2026 pole vaulting season.

Nasungkit naman ni Bo Kanda Lita Baehre ng Germany ang ginto sa nasabing palaro, habang si Pedro Buaro ng Portugal ang nag-bronze.

Sa kasalukuyan, world number 14 si Obiena sa pinakabagong men’s pole vault world rankings. | Sa panulat ni Anjo Riñon

Matapos ang panalo ng Argentina kontra England sa 2026 FIFA World Cup semifinals, posibleng parusahan ang Argentinian football team dahil sa ipinalabas nitong political statement kaugnay ng Falklands War noong dekada 80.

Nabatid na nagpalabas ng banner ang ilang player ng Argentina na may katagang “Las Malvinas son Argentinas,” o “Sa Argentina ang Malvinas,” na tawag naman ng naturang bansa sa Falkland Islands, na kasalukuyang hawak ng United Kingdom, kung saan kabilang ang England.

Una nang sinabi ni Argentina Head Coach Lionel Scaloni na nais niyang iwasang ungkatin ang isyu ng Falklands matapos tawagin ni Argentinian Vice President Victoria Villarruel na mga “pirata” ang Inglatera bago ang semifinals game.

Wala pang pahayag ang FIFA o ang International Football Association Board kung iimbestigahan ng mga ito ang insidente.

Nakatakda namang magharap ang Argentina at España sa FIFA World Cup finals sa Lunes, 3:00 ng umaga, oras sa Pilipinas. | Sa panulat ni Anjo Riñon

Kinapos ang Alas Pilipinas laban sa Cambodia sa pagbubukas ng Week One ng Southeast Asian Volleyball Cup Men’s Division.

Sa kabila ng matinding puwersa ng Alas, nabigo ang koponan sa limang set na may scores na 23-25, 30-28, 20-25, 25-22, at 8-15.

Ayon kay Alas Pilipinas libero Josh Ybañez, adrenaline at painkillers ang tumulong sa kanya upang makapaglaro pa sa kabila ng mild ankle sprain na kanyang iniinda.

Bagama’t yumuko ang Alas Pilipinas sa Cambodia, pursigidong inihayag ng Alas libero na naghahanda na silang makabawi sa mga susunod na laro sa nasabing torneo.

Sunod na sasagupain ng pambansang koponan bukas, July 17, ang defending SEA V League second leg champion na Indonesia.