HOT STORIES OF THE WEEK

“Masaya tayo sa progreso, pero hindi dapat makuntento.”

Ito ang binigyang-diin ni House Speaker Faustino Dy III, kaugnay ng pagbuti ng ranking ng Pilipinas sa 2025 Programme for International Student Assessment o PISA.

Ayon kay Speaker Dy, “welcome news” ito at patunay na ang pamumuhunan at reporma sa edukasyon ay nagsisimula nang magdulot ng magandang resulta.

Pinuri rin ni Speaker Dy ang administrasyon ni Pangulong Ferdinand Marcos Jr., ang Department of Education o DepEd hanggang sa mga paaralan, sa kabila ng mga hamon sa sektor ng edukasyon sa ating bansa.

Gayunman, sinabi ni Dy na mahalagang maipagpatuloy ang mga naumpisahan, at tiyakin na ang progreso ay makakaabot sa bawat silid-aralan at bawat batang Pilipino.

Batay sa latest na resulta ng PISA… ang Pilipinas ay nasa ika-labing lima pagdating sa Science; ika-labing pito sa Math; at ika-labing siyam pagdating sa Reading.

Tiniyak naman ni Speaker Dy na katuwang ng gobyerno ang Kongreso sa pamamagitan ng pagsuporta sa lahat ng mga reporma, programa at pondo na kailangan ng mga guro at mga mag-aaral, tungo sa de-kalidad na edukasyon. | mula sa panulat ni Geli Mendez

Patuloy na pinalalakas ng Department of Education o DepEd ang pagpapatupad ng Anti-Bullying Law sa bawat paaralan sa bansa.

Ito ang sinabi ni Education Secretary Sonny Angara, matapos tanungin sa pagdinig ng Appropriations Committee ni Akbayan Partylist Rep. Perci Cendaña ukol sa mga hakbang ng departamento para tugunan ang pambubully sa mga mag-aaral.

Binigyang-diin ni Cendaña ang nakababahalang ulat ng EDCOM 2, na tinukoy ang Pilipinas bilang “Bullying Capital of the World” na nakakaapekto sa learning competency ng mga mag-aaral.

Isa rin aniya ito sa nakikitang dahilan ng mga insidente ng karahasan sa mga paaralan.

Ayon kay Angara, mahigit 36-thousand schools na ang may gumaganang Child Protection Committees na tumutugon sa mga kaso ng bullying at iba pang suliranin ng mga estudyante.

Pinalalakas din ng DepEd ang mental health support sa pamamagitan ng mas mabilis na pagha-hire ng school counselor associates, na maaari nang makumpleto sa loob ng halos 30 araw.

Iniulat din ni Angara na 100 percent na ang designation ng Learning Formation Officers sa lahat ng paaralan. | mula sa panulat ni Geli Mendez

Binago ng House prosecution panel ang pagkakasunod-sunod ng presentasyon ng Articles of Impeachment laban kay Vice President Sara Duterte.

Sa pagtatapos ng Day 22 ng impeachment trial, hiniling ni House Lead Prosecutor Gerville Luistro sa Senate Impeachment Court na imbis na Article III na tumutukoy sa bribery at corruption, kanila munang uunahin o isusunod ang Article II na may kaugnayan sa unexplained wealth o hindi maipaliwanag na yaman ng Bise Presidente.

Ayon kay Luistro, ang kanilang mungkahi na i-advance ang presentasyon sa Article II ay dahil sa availability ng mga testigo na haharap sa impeachment trial.

Nilinaw ni Luistro na ang pagbabago sa pagkakasunod-sunod ay hindi nangangahulugang inalis o ibinasura na ng prosecution ang Article III.

Binigyang-diin ng lead prosecutor na mananatili ang lahat ng apat na Articles of Impeachment at walang anumang artikulo ang aalisin sa kanilang presentasyon.

Matatandaang nauna nang inihayag ng prosecution na pinag-aaralan nila kung itutuloy ang presentasyon ng Article III o bribery charge at diretsong magtutungo sa Article II na mas may bigat o matibay.

Kabilang sa tatalakayin na sakop ng unexplained wealth ang mga bank at tax records ni VP Sara at asawang si Atty. Manases Carpio. | mula sa panulat ni Geli Mendez

Hindi na ihaharap bilang witness stand ng House prosecution team si dating DepEd Special Disbursing Officer Edward Fajarda.

Ito ang kinumpirma ni Private Prosecutor Atty. Reynaldo Robles sa Senate Impeachment Court na ang kanilang pag-withdraw ay bilang konsiderasyon ng prosecution sa medical condition ni Fajarda.

Matatandaang sa liham na ipinadala ni Fajarda sa prosecution, hiniling niya na palawigin ng 30 days ang kaniyang pagpapahinga, batay na rin sa desisyon ng kaniyang personal doctor matapos ma-stroke.

Ayon kay Robles, ibabatay na lamang ng prosecution sa naging stipulation ang mga naging testimonya ni Fajarda sa nakaraang pagdinig ng House Committee on Good Government and Public Accountability.

Bukas, nakatakdang isalang ang tatlo pang natitirang testigo ngayong linggo, kabilang na si Police Major Jovelyn Magay; Commission on Audit o COA employee Bresildo Sabaldan; at DepEd Assistant Secretary Sunshine Charry Fajarda.

Nilinaw naman ni House Lead Prosecutor Gerville Luistro na bukod kay Fajarda, hindi na rin ihaharap ng prosecution sa witness stand si dating OVP Security Officer Col. Raymund Lachica dahil sapat na ang mga naipresintang ebidensya at testimonya sa impeachment trial kaugnay sa Article 1 na tumutukoy sa maling paggamit ng confidential funds ni VP Sara. | mula sa panulat ni Geli Mendez

Aabot sa 7.78-billion pesos ang kailangan ng Department of Education para sa rehabilitasyon ng mahigit dalawang libong paaralang napinsala ng habagat at mga bagyo.

Sa datos ng Department of Education, nasa 11,167 na silid-aralan ang apektado sa buong bansa, kung saan 6,530 ang may kaunting pinsala, 2,389 ang may malaking pinsala at 2,248 ang nasira.

Ilalaan ang 5.62-billion pesos sa reconstruction ng halos limandaang lubos na napinsalang school sites, kabilang ang mahigit animnaraang paaralan sa Central Luzon.

Kailangan ng nasabing rehiyon ang 19.4-million pesos para sa paglilinis, 111.4-million pesos para sa minor repairs, habang 402.5-million pesos para sa major repairs at 2.37-billion pesos para sa reconstruction. | mula sa panulat ni Jordan Gutierrez