Nabalot ng kulay pulang ilaw ang harapang bahagi ng Manila Cathedral at iba pang simbahan sa buong Pilipinas bilang pakikiisa sa Red Wednesday Campaign ng Simbahang Katolika.
Bago iyan, pinangunahan ng bagong talagang Apostolic Nuncio to the Philippines Archbishop Gabriele Giordano Caccia ang isang misa na alay sa mga Kristiyano na nakararanas ng panggigipit at pag-uusig sa iba’t ibang panig ng mundo.
Ayon kay Jonathan Luciano, National Director of Aid to the Church in Need Philippines, layon nitong maimulat ang kamalayan ng publiko hinggil sa nararanasang pag-uusig sa mga kristiyano.
Laganap umano ito sa mga bansang mayruong presensya ng fundamentalist group tulad ng Islamic State of Iraq and Syria o ISIS sa Gitnang Silangan gayundin ng Boko Haram sa Africa.
Maliban sa Manila Cathedral, nagkulay pula rin ang ilaw sa harapan ng mga simbahan sa bansa tulad ng mga katedral sa Lingayen-Dagupan sa Pangasinan, Cebu, Davao, Cotabato gayundin sa EDSA Shrine at Immaculate Conception Cathedral sa Cubao, Quezon City.
—-