Nagpasaklolo na sa United Nations o UN ang lokal na pamahalaan ng Albay dahil sa problema ng kakulangan sa mga evacuation center.
Batay sa kanyang liham, sinabi ni Cedric Daep, pinuno ng Albay Public Safety and Emergency Management Office kay Hideko Myagawa, ang Chief ng Education Section ng UNICEF Philippines na nangangailangan sila tatlongpo’t limang (35) malalaking tents o kahit anong uri ng malaking temporary shelters.
Ayon kay Daep, umaabot na sa walongpung (80) indibidwal ang nagsisiksikan sa isang silid-aralan dahilan para mahirapan ang mga ito sa pagtulog at magkahawaan sila ng sakit.
Maliban dito, binanggit din ni Daep sa kanyang sulat na marami nang estudyanteng naaapektuhan ang pag – aaral dahil patuloy na ginagamit ang kanilang mga paaralan bilang evacuation centers.
Matatandaang ipinag–utos ni Pangulong Rodrigo Duterte sa Armed Forces of the Philippines (AFP) na ipadala ang lahat ng available na portalet sa Metro Manila Patungong albay.
Ayon sa Pangulo, maraming mga bakwit na nananatili ngayon sa iba’t ibang mga evacuation center ang nangangailangan ng malinis na palikuran.
Giit pa ni Pangulong Rodrigo Duterte, dapat panatilihin ang maayos na hygiene at sanitation sa mga evacuee para hindi magkaroon ng outbreak ng iba’t ibang uri ng sakit.