AFP nakaalerto na sa pananalasa ng Bagyong Gorio

Handa ang Armed Forces of the Philippines (AFP) National Capital Region Joint Task Force na tumugon sa anumang emergency response bunsod ng mga nararanasang pag-ulan sa Metro Manila at mga karatig lalawigan.

Ayon kay AFP Public Affairs Office Chief Col. Edgard Arevalo, inalerto na nila ang kanilang Joint Task Force sakaling may maitalang emergency tulad ng flashflood o landslide.

May naka-standby din aniya silang puwersa na maaaring ipadala sa iba’t ibang sangay ng AFP kung kinakailangan lalo na sa disaster and emergency response.

Una rito, naka-alerto na rin ang NDRRMC o National Disaster Risk Reduction and Management Council hinggil sa posibleng pinsalang idulot ng pananalasa ng Habagat na pinaigting ng Bagyong Gorio na nasa dulong Hilagang Luzon.

Mga residente na nakatira sa gilid ng Marikina River pinaghahanda na sa posibleng paglikas

Inabisuhan na ng lokal na pamahalaan ng Marikina ang mga residente nilang nakatira sa gilid ng ilog na maghanda sa posibleng paglikas.

Ito’y makaraang magsimulang tumaas ang lebel ng tubig sa Marikina River matapos ang walang tigil na pag-ulan kahapon dulot ng habagat na pinaigting pa ng Bagyong Gorio.

Partikular na inalerto ng pamahalaang lokal ang mga residente sa Barangay Tañong, Malanday, Tumana at San Roque na pawang matatagpuan sa gilid ng Marikina River.

Batay sa pinakahuling monitoring sa Marikina River, umakyat sa 14. 4 meters ang lebel ng tubig dito o halos malapit na sa 15 meters alert level na hudyat ng unang alarma.

DSWD naka ‘blue alert’ na ngayon

Nasa blue alert na ngayon ang DSWD o Department of Social Welfare and Development kasunod na rin ng paglakas ng Bagyong Gorio na siyang nagdulot ng malakas na pag-ulan sa Luzon at Visayas.

Dahil dito, pinaigting na ng kagawaran ang kanilang mga paghahanda sa posibleng epekto ng bagyo sa pamamagitan ng pre-positioniing ng mga relief goods.

Kabilang sa mga inihanda ng DSWD ang mahigit apatnaraang libong (400,000) family food packs na nagkakahalaga ng mahigit isandaan at animnapu’t siyam na milyong piso (P169-M) habang nasa mahigit apatnaraan at pitumpung milyong piso (P470-M) naman ang halaga ng mga non-food items.

Naglaan din ang DSWD ng standby funds na nagkakahalaga ng isa punto walong milyong piso (P1.8-M) habang nasa mahigit isang bilyong piso (P1-B) naman ang available na quick response fund.

Handa na rin ang mga parent leaders ng 4P’s o Pantawid Pamilyang Pilipino Program upang magsilbing force multipliers para sa humanitarian response operations sa buong bansa.

- Jaymark Dagala

Comments

comments