Nilinaw ng con artist na si Xian Gaza na hindi ang businessman at talent manager na si Wilbert Tolentino ang kaniyang tinutukoy sa kaniyang Facebook post.
Kasunod ito ng inilabas na video at ilang mga screen shots na tila tumutukoy umano sa naturang talent manager.
Matatandaang nagkaroon ng bangayan sa pagitan ni Wilbert at kapwa YouTube vlogger na si Zeinab Harake hinggil sa kanilang personal na isyu dahilan para magbigay ng reaksiyon ang ilang mga social media influencers kabilang na si Xian.
Ayon kay Xian, inosente siya at wala siyang binabanggit na pangalan sa kaniyang inupload na video kung saan, binanggit nito na isang YouTuber ang mastermind at lider ng Credit Card Fraud at Online Scam Syndicate partikular na ang Extortion, Dummy Accounts at Catfishing.
Sa ngayon, burado na ang naging post ni Xian na nagsasabing siya ay inosente hinggil sa naturang isyu.
