Sinibak na sa pwesto ang traffic enforcer ng Metropolitan Manila Development Authority (MMDA) habang iniimbestigahan ang kasama nito, matapos mag-viral nang mangikil ng pera sa mga motorista sa Mindanao avenue sa Quezon City.
Kinilala ang traffic enforcer na si Wilson Palilio, nakatalaga sa MMDA bus management and dispatch system habang ang kasama nito ay si Sherwin Musni.
Ayon sa MMDA, isang nagngangalang Alden Chua Tan ang nag-upload ng video kung saan makikita sina Palilio at Musni na nanghuhuli ng mga motoristang bumabaybay sa Mindanao Avenue extension na lumabag sa batas-trapiko.
Nang tanungin ni Tan ang dalawang enforcer kung lehitimo ang kanilang operasyon at hinimok na magpakita ng ids ay saka umalis ang mga ito.
Sa ngayon, patuloy pang iniimbestigahan ng mmda ang insidente.
