Sa gitna ng pagtalakay ng 2026 budget ng Office of the Vice President (OVP), nagkaroon ng palitan ng salita sa pagitan ng mga mambabatas matapos ang mga tanong ni ACT Teachers Partylist Rep. Antonio Tinio kay Vice President Sara Duterte hinggil sa update sa notice of disallowance na hinihingi ng Commission on Audit (COA) at kung magkano ang ginastos ng OVP sa mga naging biyahe ni VP Sara sa ibang bansa.
Sa huling tanong ni Tinio, humirit pa ito ng follow-up question ngunit hindi na ito pinayagan ni Committee Vice Chairperson Jose Alvarez dahil sa limang minuto lamang ang nakatakdang oras para sa interpelasyon ng bawat kongresista.
Para kay SAGIP Partylist Rep. Henry Marcoletta, hindi dapat binabanatan ang Bise Presidente sa gitna ng budget deliberation ng OVP. Sinegundahan din ni Davao City Rep. Isidro Ungab ang pahayag ni Marcoletta. Ngunit giit ni Tinio, wala silang binabanatan at pawang legal na pagtatanong lamang ang kanilang ginagawa.
Agad ring na-terminate ang budget deliberation ng OVP matapos magbalik ang sesyon ng komite.
Para kay VP Sara, malinaw na binabanatan siya ng ilang miyembro ng minorya sa Kamara sa deliberasyon ng OVP budget. Nilinaw din niya kung bakit siya lang ang dumalo sa budget hearing, at sinabi na na-trauma ang ilan sa kaniyang mga tauhan habang ang iba naman ay hindi maganda ang pakiramdam.
