Nagpahayag ng suporta si Vice President Leni Robredo sa kampaniya ng Armed Forces of the Philippines (AFP) na buwagin ang nalalabing pwersa ng mga terrorista sa bansa.
Inihayag ito ng Pangalawang Pangulo kasabay ng kaniyang pagbisita sa punong tanggapan ng Western Mindanao Command (WESMINCOM) sa Camp Navarro, Zamboanga City.
Kasabay nito, pinapurihan din ng Pangalawang Pangulo na Ex officio member ng National Security Council ang mga hakbang para sa pagtatamo ng kapayapaan at kaunlaran sa rehiyon ng Zamboanga, Basilan, Sulu at Tawi-Tawi (ZamBaSulTa).
Sinamantala rin ni Robredo ang pagkakataon na mamahagi ng Antigen test kits at iba pang mga medical supplies para sa mga tauhan at pasyente ng Camp Navarro General Hospital.
Nagpasalamat naman si WESMINCOM Chief Lt/Gen. Alfredo Rosario Jr sa mga ipinagkaloob na medical supplies ng OVP at makaaasa aniyang magagamit ang mga ito para sa mga medical frontliners na sumasabak din sa giyera laban sa COVID-19 sa kanilang lugar. —sa ulat ni Jaymark Dagala (Patrol 9)
