Hindi tatantanan ng Philippine National Police (PNP) ang mga miyembro ng New People’s Army (NPA) para habulin o papanagutin sa batas.
Ito ang inihayag ni PNP Chief, P/Gen. Dionardo Carlos kasabay ng ika-53 na anibersaryo ng Bagong Hukbong Bayan o New People’s Army ngayong araw na ito.
Kasabay nito, ini-ulat ng PNP ang pagkakaaresto nila sa Secretary General ng Bayan Muna Panay chapter at isa umanong NPA leader na si Elmer Forro Sr.
Naaresto si Forro ng mga tauhan ng Police Regional Office o Western Visayas PNP sa bahagi ng Sitio Bangko, Brgy. Lutac, Cabatuan, Iloilo sa bisa ng warrant of arrest dahil sa mga kasong Murder at Attempted Murder.
Kasunod nito, sinabi ng PNP Chief na palalakasin nila ang mga ligal na opensiba laban sa mga rebelde upang sila’y makapagdiwang ng susunod nilang mga anibersaryo sa bilangguan. – ulat mula kay Jaymark Dagala (Patrol 9)