Ikinakasa na ng Philippine National Police (PNP) ang samu’t saring kaso laban kay Pilar, Abra Vice Mayor Jaja Josefina Disono.
Ito’y kasunod ng pagbalewala ng sasakyan ni Disono sa inilatag na Checkpoint ng PNP sa Brgy. Poblacion na nauwi sa engkwentro at habulan.
Ayon kay PNP Spokesperson, P/Col. Jean Fajardo, maliban sa kasong admnistratibo, posible ring maharap sa mga kasong kriminal ang mga sakay ng SUV ni Disono maging sa paglabag nito sa Omnibus Election Code partikular na sa gun ban.
Hanggang ngayong araw, bigo pa rin ang mga Pulis na malaman kung sino ang driver at mga sakay ng sasakyan ni Disono at kung ilang armas ang nakatago rito.
Muling iginiit ni Fajardo na lehitimong operasyon at hindi harassment ang ginawa ng mga Pulis sa kampo ni Disono. – ulat mula kay Jaymark Dagala (Patrol 9)
