Pinalagan ni Marinduque Representative Lord Allan Velasco ang panawagan ng kanyang mga kapwa mambabatas na magpaubaya na lamang kay House Speaker Alan Peter Cayetano usapin ng house speakership.
Sa kanyang Facebook post, inilabas ni Velasco ang larawan ng pinirmahan nilang kasunduan ni Cayetano noong 2019 hinggil sa term sharing sa pagka-house speaker.
Iginiit ni Velasco, dapat manindigan silang dalawa ni Cayetano sa kanilang napagkasunduan na ginawa aniya para sa Diyos at bayan.
Dagdag ni Velasco, noong una pa lamang ay kanya nang nilalayong kilalanin ang kanilang kasunduan na nabuo sa harap mismo ng pangulo.
Aniya, sing-linaw ng kristal ang kanilang kasunduan para sa 15-20 term sharing kung saan matatapos ang unang termino sa ika-30 ng Setyembre na susundan naman ng pagsisimula ng ikalawang termino.
Binigyang diin ni Velasco, dapat sundin ng magkabilang panig ang kanilang kasunduan bilang pagpapakita ng isang totoong pinuno at halimbawa sa mga tao at upang hindi masira ang tiwala ng publiko.
