Nakatakda nang lagdaan ng Valenzuela City government at ng British drug maker na AstraZeneca ang isang kasunduan para sa pag-aangkat ng COVID-19 vaccine.
Ayon kay Senator Sherwin Gatchalian, na base sa kanyang pakikipag-usap sa kanyang kapatid na si Valenzuela City Mayor Rex Gatchalian, posibleng magkasundo na sa loob ng isang linggo ang dalawang partido.
Gayunman, inaasahang sa darating pa na Hulyo maide-deliver ang bakuna.
Aminado ang senador na may katagalan ang gagawing paghihintay ng Valenzuela City LGU bago matanggap ang COVID-19 vaccine na maaring maipamahagi sa 40% o humigit kumulang 300,000 populasyon ng lungsod.
Tiniyak naman nito na magiging libre para sa mga taga-lungsod ang makukuha nilang bakuna at mananatiling prayoridad ang kanilang mga frontliners at mga mahihirap.
Samantala, nagpahayag naman ng pag-aalala si Sen. Gatchalian para sa mga LGU na walang sapat na kakayahan para makabili ng sariling bakuna para sa kanilang mga constituents.
