Sinampahan na ng kaso ng pamilya ni Horacio “atio” Castillo the third ng murder, perjury, obstruction of justice at paglabag sa RA 8049 o Anti-Hazing Law si U.S.T. Faculty of Civil Law Dean, Atty. Nilo Divina.
Kasunod na rin ito ng pagpayag ng panel of prosecutors sa hirit ng pamilya Castillo na pagbigyan sila ng karagdagang panahon upang makapaghain ng supplemental complaint affidavit at maisama sa kanilang reklamo si Divina.
Ito’y dahil may basbas umano ni Divina ang initiation rites sa Aegis Juris library bilang senior member ng kanilang fraternity at walang ginawang hakbang upang masawata ang hazing na naging dahilan ng pagkasawi ni atio.
Magugunita noong October 4 o sa unang araw ng preliminary investigation sa mga kasong murder, perjury, robbery at paglabag sa anti-hazing law, inilahad ni Atty. Lorna Kapunan, abogado ng pamilya Castillo na nais nilang maghain ng supplemental complaint affidavit.
Bunsod ito ng bagong development sa kaso at nais rin nila na isama si Dean Divina bilang respondent sa murder case.