Maaaring maisama ang United Arab Emirates (UAE) sa listahan ng mga bansang sakop ng travel restrictions dahil sa bagong variant ng coronavirus.
Ito ang inihayag ng Malakanyang matapos na mapag-alamang positibo sa UK variant ng COVID-19 ang isang Filipinong bumiyahe sa UAE kamakailan.
Ayon kay Presidential Spokesperson Harry Roque, malaki ang tsansang patawan din ng travel restriction ang UAE kasunod ng bagong nadiskubre.
Ani Roque, hinihintay na lamang ang pormal na desisyon mula kay Pangulong Rodrigo Duterte na inaaasahang ipalalabas nito sa mga susunod na araw.
Una na ring sinabi ng Department of Health na kanilang irerekomenda na maisama ang UAE sa listahan ng mga bansa mayroong travel restrictions.
Sa kasalukuyan, nasa 32 bansa at teritoryo na ang sakop ng ipinatutupad na travel restrictions ng pamahalaan para pagilan ang pagkalat ng bagong variant ng COVID-19 sa Pilipinas.