Isinusulong ni Senador Manny Pacquiao ang panukala para tuluyan nang buwagin ang Road Board na kumukolekta aniya ng bilyon–bilyong piso para sa pagpaparehistro ng mga bagong sasakyan.
Sinabi ni Pacquiao na simula 2001 hanggang 2014, nakakolekta ang Road Board ng 112.5 bilyong piso mula sa motor vehicle user’s charge ngunit inilaan ito sa mga proyektong hindi sakop ng batas na gumawa sa board.
Dagdag pa ni Pacquiao na noong 2011 ay nilustay ng Road Board ang halagang 62 milyong piso sa ibang bagay sa halip na gamitin sa pagmementina at pagkukumpuni ng lansangan na intensiyon ng ahensya.
Dahil dito, iginiit ni Pacquiao na dapat ilipat na ang lahat ng yaman at ari-arian nito sa Department of Public Works and Highway (DPWH) at Department of Transportation (DOTr).
Matatandaang labis na ikinairita at ikinadismaya nina Senate Finance Committee Chairman Loren Legarda, Senator Juan Miguel Zubiri at Minority Leader Franklin Drilon ang pag-isnab ng mga opisyal ng Road Board sa hearing ng budget ng DPWH at mga attached agency nito.
Sa halip na dumalo, sumulat ang Executive Director ng Road Board na si Luisito Clavano na nagsabing hindi na umano sila nakapailalim sa DPWH, sa halip ay nasa ilalim na sila ng Office of the President.
Ito ang dahilan ng pagka-irita at pag-init ng ulo nina Legarda lalo’t marami pa umanong isyung na itatanong sa mga opisyal ng Road Board.