Hiniling ni Senator Antonio Trillanes IV sa Korte Suprema na ilipat ang paglilitis sa P200 million damage suit na isinampa ni Vice President Jejomar Binay laban sa kanya at sa iba pang respondent.
Giit ni Trillanes, balwarte ng mga Binay ang Makati City kaya’t marapat lamang na ilipat sa Maynila ang hearing ng nasabing kaso.
Binigyang diin pa ng Senador na magkakaroon ng miscarriage of justice kung hindi ililipat ang trial venue ng naturang reklamo ni Binay.
Harapin na lang ang kaso
Samantala, hinamon ni Atty. Rico Quicho, tagapagsalita ni Vice President Jejomar Binay si Senador Antonio Trillanes IV na harapin ang Bise Presidente sa korte at sagutin ang mga akusasyon laban sa kanya.
Sinabi ni Quicho na dapat sagutin na lang ni Trillanes ang damage suit laban dito at sa 12 katao na isinampa ni Binay sa halip napagdudahan ang integridad ng mga korte.
Pinuna ni Quicho na muling ipinakita ni Trillanes na umiilag ito sa pagiging patas sa pamamagitan ng paghiling sa court administrator na ilipat sa ibang lugar ang pagdinig sa civil suit na isinampa ni Binay laban sa senador.
Ipinaalala ni Quicho sa senador kung paanong tinawag nitong duwag ang Bise Presidente dahil sa hindi nito pagharap sa may kinikilingang pagdinig ng Senate Sub-Committee.
By Jelbert Perdez | Mariboy Ysibido
