Naniniwala si Technical Education and Skill Development Authority (TESDA) Director Joel Villanueva na nasa loob ng administrasyon ang puwersang nagpilit na isama siya sa ikatlong batch ng mga kinasuhan sa pork barrel scam.
Binigyang diin ni Villanueva na nararamdaman niya ang pagkakaroon ng selective injustice dahil sa ilang tao na hindi natutuwa sa tuwing nakakatanggap ng papuri ang TESDA.
“Ayoko pong isipin ‘yun unfortunately parang ngayon talagang klaro po sa akin na ‘yung selective injustice naman ang nararanasan kop o ngayon, gusto ko rin pong klaruhin na hindi ko naman po sinabi kasi na ang behind po dito ay si Secretary Mar, and I certainly don’t believe na he’s behind this, but I stand by my word na talagang meron pong mga forces sa administrasyon na gusto po akong i-etsapuwera, everytime na tayo’y napupuri ni Pangulong Noynoy sa mga ginagawa po natin sa TESDA eh may mga tumataas po ang kilay na tila baga ay hindi po natutuwa.” Ani Villanueva.
Iginiit ni Villanueva na bagamat mayroon siyang pagkakataon na magpaliwanag hinggil sa akusasyon, nadungisan na din naman ang pangalan na kanilang inaalagaan.
“Pangalan na lang po naming Villanueva ang nakataya dito, ito na lang po ‘yung aming nag-iisang kayamanan, eh para po paratangan, sasabihin po eh maide-defend mo naman ang sarili mo at makaka-answer ka, yes maganda din somehow nakaka-relieve na makapagsalita at makadepensa finally pero the damage has been done eh.” Pahayag ni Villanueva.
Pork scam
Ikinalungkot ni TESDA Director Joel Villanueva sa ikatlong batch ng mga kinasuhan sa pork barrel scam.
Sinabi ni Villanueva na bukod sa una nang napatunayang napeke lamang ang kanyang pirma ay hindi din naman siya binabanggit nina Janet Lim Napoles.
Hindi din aniya siya isinama nina Napoles sa listahan ng mga naka-transaksyon dahilan para magulat siya sa pagkakasama sa kinasuhan sa Ombudsman.
“Mga staff po natin sa CIBAC Partylist at maging mga staff ni Janet Lim Napoles wala pong naging any deal, ‘yung buong pagpupulong doon sa senado, ilang beses pong tinanong ng mga senador may idadagdag po ba kayong mga pangalan na nakausap na naka-transaksyon? wala na daw po, ang nakakalungkot po bagamat ganito ‘yung sitwasyon eh pinilit pa rin po tayong isama.” Dagdag ni Villanueva.
By Katrina Valle | Sapol ni Jarius Bondoc
