Nakatakdang simulan ng Department of Education (DEPED) ang pagtatayo ng “temporary learning spaces” sa mga lugar na naapektuhan ng magnitude 7 na lindol sa susunod na linggo.
Ito ang inihayag ni DEPED Spokesperson Atty. Michael Poa upang matiyak na walang magiging delay sa pagbubukas ng klase maging sa mga lugar na tinamaan ng lindol.
Aniya, posibleng abutin lamang ng tatlong araw ang pagtatayo ng mga temporary learning spaces dahil gagamit lamang ng light materials para rito.
Nasa 180,000 pesos ang magagastos sa pagpapatayo ng kada learning center.
Sakali namang hindi kayanin dahil sa dami ng kailangang ipatayo, ay posibleng ipagpatuloy muna ang modular learning.
Sa pinakahuling assessment ng DEPED, nasa halos 500 silid-aralan ang naiulat na nasira dahil sa lindol.
Samantala, nilinaw ni Poa na mananatili pa rin naman ang blended learning sa pagsisimula ng pasukan ngayong Agosto.
