ITINANGHAL na solo champion sa katatapos na 3rd edition ng “Basagan ng Pula” 12-Cock Derby sa Lipa City Arena sa Batangas ang tambalan ng mga tigasing breeders.
Sa pamamagitan ng entry name na “Mescaleros Tito Den RM Jepoy”, kumamada ng 9.5 points ang tandem nina Dennis Samsom at Ramon Mansenares.
Dahil dito, nasungkit nina Samson at Mansenares ang tumataginting na P30 milyong premyo sa binansagang “The Ultimate Explosive Event” na sumiyapol noong Abril 29 hanggang Mayo 1, taong kasalukuyan.
Ang lahat ng sultada ay ipinalabas nang live sa Pitmaster Live na pinamumunuan ng kilala at respetadong sabungero na si Charlie “Atong” Ang.
Ang tigasing si Edwin Tose ay kabilang sa mga pinadapa ng “Mescaleros Tito Den RM Jepoy” sa three-day derby.
Naging bahagi rin ng panalo nina Samson at Mancenares sina Bebot Jaspe (handler) at Norman De La Penia (gaffer).
Sa exclusive interview ng “Sabong On Air” sa DZME 1530 ni Ka Rex Cayanong, inamin ni Samson na ang mga ginamit nilang bloodline ay mga Sweater na crossed sa Gilmore.
Ayon kay Samson, tinatayang 3 1/2 taon na ang edad ng kanilang warriors.
“Ilang buwan po namin hinanda ‘yung mga panlaban namin kasi hindi basta-basta ang mga kasali, magagaling ang mga kalaban,” pahayag ni Samson.
Nasa labintatlong taon na ang karanasan ni Samson sa pagsasabong matapos maimpluwensiyahan ng kanyang ama at mga kapatid.
Tiyaga, sipag at determinasyon ang sinasabing naging puhunan ni Samson na naging dahilan upang makamit ang inaasam nilang tagumpay sa pagmamanok.
Payo naman ni Samson sa mga kapwa sabungero, mahalagang bigyan ng tamang pansin at oras ang mga panlabang manok.
