Ibabalik na sa susunod na taon ang suplay ng tubig sa mga residente ng Marawi City.
Ito ang tiniyak ng Local Water Utilities Administration (LWUA) kay Senator Robin Padilla na magkaroon ng sapat na tubig sa kabila ng problema sa procurement at site acquisitions.
Matatandaang mahigit limang taon nang walang tubig ang mga taga-Marawi matapos ang 2017 Marawi Siege na ikinadismaya ni Sen. Padilla sa kabila ng bilyun-bilyong pisong budget na binigay ng gobyerno.
Ayon sa LWUA, nagpapatuloy ang kanilang mga tauhan sa pagsasaayos ng water treatment plant; mga water reservoir; pipeline; at site development work para sa water intake facilities.
Bukod pa dito, inaprubahan na rin ng Philippine Army (PA) ang Revised Site Development Plan para sa Water Treatment Plant at mga reservoir sa loob ng kampo kung saan, hinihintay na lamang ang pag-apruba nito sa draft ng Memorandum of Agreement.