Itutuloy ngayong araw ng Senate Blue Ribbon Committee ang pagdinig hinggil sa $81 million international money laundering scheme.
Bago nito, inaasahang isisiwalat ni RCBC- Jupiter, Makati Branch Manager Maia Santos-Deguito sa isang executive session ang lahat ng kanyang nalalaman sa kontrobersya.
Gayunman, inihayag ni Committee Chairman Teofisto ‘TG’ Guingona na kakausapin muna niya ang mga miyembro ng panel kung nais pa nilang marinig ang panig ni Deguito.
Tanging mga senador at kanilang mga staff ang pinapayagan sa executive session at ituturing na “confidential” ang bawat impormasyon na ihahayag.
Sa ngayon tanging sina Guingona, mga kapwa senador na sina Ralph Recto, Sergio Osmeña III at Sonny Angara ang nagpahayag ng interes na marinig ang panig ni Deguito sa isang executive session.
Bangladesh
Umaasa ang pamahalaan ng Bangladesh na maisasauli sa kanila ang 81 milyong dolyar na ninakaw mula sa kanilang bangko sentral.
Inihayag ito ni Bangladeshi Ambassador to Manila John Gomes kasunod ng isinagawang pagdinig ng senado hinggil sa money laundering scheme.
Ayon kay Gomes, nakalulungkot aniya ang nangyari dahil pinaghirapan ng pamahalaan gayundin ng kanilang mga mamamayan sa Bangladesh ang nasabing salapi.
Pagtitiyak naman ni Gomes, nakikipag-ugnayan sila sa mga awtoridad ng Pilipinas na nag-iimbestiga sa ginawang pangha-hack sa kanilang computer system dahilan para manakaw ang multi – bilyong dolyar mula sa kanilang kaban.
By Drew Nacino | Jaymark Dagala
