Nababahala si Senate Deputy Majority Leader JV Ejercito sa mga posibleng negatibong epekto sakaling umusad ang impeachment complaints laban kina Pangulong Ferdinand Marcos Junior at Vice President Sara Duterte.
Ayon kay Senador Ejercito, batid niyang parte ng kanilang constitutional duty bilang mga mambabatas ang aksyunan ang anumang reklamo laban sa sinumang opisyal ng pamahalaan.
Pero sa kabila anya nito, hindi maitago-tago ang kanyang pagkadismaya dahil posible anyang magpakita ng ‘political instability’ sa ibang bansa ang pag-impeach sa dalawang pinakamataas na opisyal ng bansa.
Ipinunto ng senador na magpapatong-patong na ang isyung kinakaharap ng bansa kung mangyayari ito lalo pa’t may flood control scandal nang tinatalakay ngayon.
Sa kabila nito, nilinaw ni Senador Ejercito na wala siyang problema sa pagpapapanagot sa sinumang sangkot sa sinasabing katiwalian.
Matatandaang may ilang grupo ang nagsampa ng impeachment complaints laban sa pangulo at pangalawang pangulo sa Kamara.
