Nagpaabot ng sobra–sobrang pasasalamat at papuri ang matataas na lider at mga delagado mula sa iba’t ibang bansa sa inilatag na seguridad ng bansa sa katatapos na 31st ASEAN Summit.
Ayon kay DILG OIC at Chairman ng ASEAN Security Committee na si Undersecretary Catalino Cuy, ito ang ipinarating sa kanya ng mga bisita sa ASEAN nang kanya itong makausap.
Ikinatuwa din aniya ng mga dumalo sa ASEAN Summit ang ipinakitang hospitality ng mga Pilipino.
Sinabi din ni Cuy na labis ang paghanga ng mga delegado sa ipinamalas na talento ng mga Pinoy lalo na sa Gala Dinner.
Tiniyak naman ni Cuy na tuloy-tuloy pa rin ang kanilang pagbabantay at ginagawang trabaho dahil namamasyal pa ang ilan sa mga delegado sa iba’t ibang lugar sa Metro Manila.
