Binulabog ng tatlong sunud-sunod na suicide bombings ang Saudi Arabia sa kalagitnaan ng preparasyon para sa pagtatapos ng Ramadan o Eid’l Fitr.
Naganap ang mga pambobomba sa Medina, isa sa mga Islamic Holy City, kung saan nakahimlay ang labi ng propetang si Muhammad maging sa mga lungsod ng Jeddah at Qatif.
Ayon sa Saudi authorities, pinaka-matindi ang naganap na pambobomba malapit sa Al-Masjid Al-Nabawi Mosque na pinaglibingan ng propeta kung saan 4 ang nasawi kabilang ang dalawang pulis.
Sa kabuuan, anim na ang nasawi sa magkakasunod na pag-atake kabilang ang tatlong suicide bomber.
Target sa mga pambobomba ang Saudi Security Forces at mga Western Interest partikular ang US Consulate sa Jeddah.
Kumbinsido ang mga awtoridad na ISIS ang nasa likod ng pag-atake lalo’t maka-ilang beses ng nagbanta ang grupo na pupuntiryahin ng kanilang mga Mujaheedin ang banal na lungsod ng Saudi Arabia na Medina at Mecca.
By Drew Nacino
Photo Credit: Reuters
