Ikinakasa na ng Philippine National Police (PNP) ang mga paghahanda nito para sa nalalapit na pagarangkada ng kampaniya para sa mga tumatakbo sa lokal na posisyon.
Sa katunayan, sinabi ni PNP Chief P/Gen. Dionardo Carlos na puspusan ang kanilang pakikipag-ugnayan sa Armed Forces of the Philippines (AFP) para pigilan ang pamamayagpag ng mga Private Armed Group (PAGs).
Nirerepaso na nila ang mga lugar na may matinding away pulitika para malagyan agad ng mga Regional Special Operations Task Group na siyang pagaganahin upang tumulong sa pagpapanatili ng peace and order situation.
Una nang inilunsad ng PNP ang KASIMBAYANAN na kanilang adbokasiya para palakasin ang ugnayan ng Pulisya, Simbahan at Komunidad para tiyakin ang ligtas na Halalan sa Mayo 9.
Kasalukuyan na rin aniya nilang isinasaayos ang mga inihaing aplikasyon para sa security detail ng mga kandidato sakaling payagan ang mga aplikante na makakuha nito. – ulat mula kay Jaymark Dagala