Nahaharap sa reklamo ang isang pulis sa Maynila matapos umanong maglabas ng baril habang sinasaway ang mga nagdiriwang na UST Judo Juniors Team sa Sampaloc, Maynila.
Naganap ito noong Linggo kung saan masayang naglalakad ang mga miyembro ng team na nasa edad 12 hanggang 17.
Nagtalunan at naghiyawan ang mga bata, suot ang kanilang uniform at mga medalya kaya sinaway ito ng pulis na nagngangalang si Police Corporal Marvin Castro.
Matapos nito, naglabas umano ng posas ang pulis at niyaya ang team na sumakay sa isang police mobile.
Dito na tumanggi ang mga estudyante, kaya hinawakan ng pulis ang kanyang service firearm.
Dahil sa nangyari, agad tinawagan ng mga estudyante ang kanilang coach.
Humingi naman paumanhin si Castro na sinabing nakaramdaman siya ng “imminent danger” sa presensya ng mga estudyante.
Sa ngayon, binawi na ang service firearm ni Castro na hindi muna mag-iikot sa lugar habang nagpapatuloy ang imbestigasyon.
Sasailalim naman sa psychological evaluation ang mga mag-aaral habang Isusumite ang kanilang mga sinumpaang salaysay kasama ang kanilang mga magulang.
