Hiniling ng pitong kongresista sa Commission on Elections (COMELEC) na iproklama na ang mga nominadong kinatawan ng Duterte Youth at Senior Citizens Partylist Groups.
Isang resolusyon hinggil dito ang inihain ng pitong kongresista sa pangunguna ni House Speaker Allan Peter Cayetano.
Nakasaad sa resolusyon na kontra na sa due process ang anim na buwang pagkakabinbin ng mga kaso laban sa Duterte Youth at Senior Citizens maliban pa sa disenfranchisement ng halos isang milyong bumoto sa dalawang grupo.
Maliban kay Cayetano, ang resolusyon ay isinusulong rin nina Cong. Martin Romualdez, Bienvenido Abante, Mikee Romero ng One Pacman, Rodante Marcoleta ng One Sagip, Conrado Estrella ng Abono at Eddie Villanueva ng Cibac.
