Lumobo ng 5,000 porsyento ang presyo ng gamot para sa mga taong may AIDS at Kanser.
Ayon kay Judith Aberg, tagapagsalita ng HIV medicine Association, umaabot na sa 750 US Dollars per pill ang halaga ng Daraprim (pyrimethamine) na panlaban sa Toxoplasmosis.
Inihayag naman ng Centers for Disease Control, nasa 60 milyong tao sa Amerika ang nagtataglay ng Toxoplasmosis na nakakaapekto sa utak at maaaring magdulot ng pagkabulag at brain damage.
Binigyang diin ni Aberg na kahit ang mga pasyente na mayroong insurance ay mahihirapan nang makakuha ng naturang gamot.
Giit ni Aberg, walang alternatibo para sa Daraprim dahil ang ibang gamot na kahalintulad nito ay hindi naman ganoon katapang.
Nakukuha umano ang nasabing sakit mula sa karne na hindi nalutong mabuti, kontaminadong kutsilyo, tubig, at dumi ng pusa.
Sinasabing ang mga buntis naman na nagtataglay ng Toxoplasmosis ay maaaring maipasa ang naturang sakit sa sanggol sa kanilang sinapupunan.
By: Jelbert Perdez
