Hindi maaaring manatiling “confidential” ang presyo ng bakuna lalo’t kung lilitaw na ito ay overpriced.
Ito ang iginiit ni Sen. Francis Kiko Pangilinan sakaling sa executive session isiwalat nina Vaccine Czar Carlito Galvez ang mga impormasyon kaugnay sa mga pinapasok na mga kasunduan para sa pagbili ng bakuna kontra COVID-19.
Ani Pangilinan, iminungkahi niya sa mga kasamahang senador na isapubliko ang impormasyon sakaling matuklasang overpriced ang binibiling bakuna.
Karapatan umano ng publiko na malaman ang mga impormasyon lalo’t kung kuwestyonable ang presyo ng mga bakunang binibili.
Gayunman, sinabi ni Pangilinan na isasapubliko ang mga ito kapag tapos at kumpleto na ang negosasyon.
Una rito, ipinag-utos ni Pangulong Rodrigo Duterte kay Galvez na ipaalam kay Senate President Vicente Sotto III ang lahat ng vaccine deals ng gobyerno para umano sa transparency.
