Umaasa ang House Prosecution Panel na maisasalang at tatalakayin sa Senate Impeachment Court sa darating na Miyerkules ng susunod na linggo ang mga ebidensya at testigo na ipiprisinta para sa Article 1 o misuse of confidential funds ng Articles of Impeachment laban kay Vice President Sara Duterte.
Sa pulong-balitaan, sinabi ni House Prosecutor at Bicol Saro Partylist Rep. Terry Ridon na posibleng agad na maisalang ang nasabing artikulo kung hindi na magkakaroon ng redirect at recross examination ang prosecution panel at defense team sa pagsalang ni National Bureau of Investigation (NBI) Director Melvin Matibag.
Ayon kay Ridon, ang pagtalakay at presentasyon ng ebidensya sa isyu ng maling paggamit ng confidential at intelligence funds ni VP Sara ang isa sa pinakainaabangan ng taumbayan.
Inaasahan kasing mauungkat ang “similarities” sa mga pirma ng mga pangalang nakatanggap at kumuha ng confidential funds mula sa Office of the Vice President (OVP) at Department of Education (DepEd) noong si VP Sara pa ang kalihim nito.
Kabilang sa mga pangalang lumutang ay sina Milky Secuya, Kokoy Villamin, at Mary Grace Piattos na ipiprisenta bilang testigo ng prosecution para pagtibayin ang mga alegasyong nakapaloob sa Article 1 laban sa Bise Presidente.
Inaasahan din na mailalahad ang report ng Philippine Statistics Authority o PSA na sinasabing walang record ng kapanganakan, kamatayan, o anumang pagkakakilanlan sa nabanggit na mga pangalan. | via Geli Mendez (Patrol 30)
