Muling nanawagan sa publiko ang Parish Pastoral Council for Responsible Voting o PPCRV na magparehistro sa pamamagitan ng biometrics.
Nanghihinayang si Ambassador Tita de Villa, National Chairperson ng PPCRV sa mga botanteng nakaboto na sa mga nakalipas na halalan ngunit hindi makakaboto ngayong darating na 2016 elections dahil sa kabiguan na i-validate ang kanilang rehistro sa pamamagitan ng pagpapa-biometrics.
Aniya kahit na nakakaboto pa ang isang botante sa mga nakalipas na halalan subalit hindi nagpa rehistro sa pamamagitan ng biometrics ay hindi makakaboto sa May 9, 2016 election.
Sinabi pa ni De Villa na dapat samantalahin ng mga botante ang nalalabing 3 araw para magparehistro.
“Alam naman natin ngayon na may bagong batas na kung hindi kumpletong biometrics ang isang botante ay hindi puwedeng bumoto sa May 9, 2016, kahit na boto siya nhg boto tuwing halalan kung hindi kumpleto ang biometrics hindi papayagang bumoto.” Pahayag ni De Villa.
One good vote campaign
Samantala, target ng PPCRV o Parish Pastoral Council for Responsible Voting na makumpleto ang 80 barangay para sa kanilang one vote campaign.
Ang 80 barangay ay kakatawan sa bawat rehiyon sa bansa.
Ayon kay De Villa, Chairperson ng PPCRV, sasailalim sa voters education ang lahat ng botante sa napiling mga barangay kung paano ang tamang pagpili ng kandidato.
Pangunahing layunin aniya ng one vote na turuan ang mga botante na iwaksi ang pagbebenta ng kanilang mga boto sa eleksyon.
“Kasi ang gusto ng PPCRV na ipakita na pag nagsama-sama ang mga mamamayan at isang sambayanan, talagang kaya nating umpisahan, hindi maaaring one try lamang eh, kaya nating umpisahan na tanggalin itong anomalyang ito sa ating halalan kasi kahit anong sistema ang gamitin mo sa halalan, manual o automated eh ang hindi nagbabago ay yang vote buying.” Pahayag ni De Villa.
By Mariboy Ysibido | Len Aguirre | Ratsada Balita