Pinahihigpitan ng DepEd o Department of Education sa mga pribado at pampublikong paaralan ang mga ipinatutupad nilang polisiya laban sa bullying.
Kasunod ito ng viral video ng junior highschool student ng ADMU o Ateneo De Manila University na si Joaquin Montes na nambully at nambugbog ng isa niyang kamag-aral.
Ayon kay DepEd Usec. Anne Sevilla, napakasensitibo aniya ng usapin ng bullying lalo’t may kaakibat ito na malaking pananagutan sa panig ng mga guro, magulang at nasasangkot.
Nangangailangan aniya ito ng ibayong pagtutok na hindi nasasagkaan ang karapatan ng isang tao na mamuhay ng tahimik at payapa sa kabila na rin ng kanilang nararanasan.
Malinaw aniyang nakasaad sa Republic Act 10627 o ang Anti-Bullying Act of 2013 na dapat magsumite ng kopya ng kanilang polisiya ang mga paaralan sa DepEd para mabusisi kung napoprotektahan ba ang karapatan ng mga kabataan.
Kasunod nito, hinimok ng DepEd ang mga biktima ng bullying na lumantad at i-ulat ang kanilang mga karanasan upang mabigyan ng karampatang aksyon.