Tututukan ng Philippine National Police (PNP) ang kaso ng pagkamatay ng isang 19 na taong gulang na college student na pinaniniwalaang nasawi dahil sa hazing sa Davao City.
Ito ang pangako ni PNP Chief Gen. Rodolfo Azurin Jr. Kung saan tutulungan nila ang pamilya ng mga biktimang sina August Ceazar Saplot at Michael Angelo Ligaya upang makamit ang sinisigaw na hustisya ng mga ito.
Matatandaang natagpuang walang buhay si Saplot sa Purok Santo Niño, Sison Village, Upper Mandug, Buhangin District habang nakaligtas naman sa hinihinalang hazing si Ligaya na kasalukuyang nagpapagaling sa ospital.
Natagpuan sa crime scene ang isang itim na sinturon at dalawang application form ng Alpha Kappa Rho.
Nasakote naman ang 14 na indibidwal, kabilang ang sinasabing lider ng Akrho Alpha Delta Chapter na si Jeremiah Moya, habang tinutugis ang anim na iba pang suspek sa krimen.
Samantala, nanawagan naman sa publiko ang pnp na tumulong sa pagligtas sa mga menor de edad at kabataan laban sa iba’t ibang uri ng krimen.
