Nakatutok ang Philippine National Police sa pag-beripika at pagtitiyak ng mga ebidensya kaugnay ng pagkamatay ng dating Department of Public Works and Highways Undersecretary Maria Catalina Cabral, na natagpuan sa Benguet.
Ayon kay PNP Acting Chief Police Lieutenant General Jose Nartatez Jr., kasalukuyang iniimbestigahan ang driver ni Cabral matapos nitong iwan ang dating opisyal sa isang bahagi ng Kennon Road sa Tuba, Benguet, alinsunod umano sa kahilingan nito.
Dagdag pa ni Nartatez, matapos makumpirma ang pagkakakilanlan ng mga labi ni Cabral, nililinaw na ngayon ng PNP ang aktwal na mga pangyayari na humantong sa kaniyang pagkamatay.
Nabatid na nagsagawa na rin ng re-enactment ang PNP Forensic Group sa kung paano natagpuang walang buhay ang dating DPWH official kasabay ng pagkalap ng mga ebidensyang posibleng makatulong sa imbestigasyon sa maanomalyang flood control projects.
Patuloy naman ang koordinasyon ng PNP sa Independent Commission for Infrastructure at iba pang kaukulang ahensya upang matukoy at masiguro ang mga ebidensiyang may kaugnayan sa patuloy na imbestigasyon sa mga proyekto ng flood control.
