Pinaigting ng Philippine National Police ang mga hakbang para matiyak ang kapakanan ng mga konsyumer sa gitna ng mga nauulat na pagtaas ng presyo ng karne at gulay, ilang linggo bago ang Pasko.
Ayon kay Acting PNP Chief Lieutenant General Jose Melencio Nartatez, Jr., nag-deploy na sila ng karagdagang tauhan sa mga palengke, supermarkets, at wet markets upang pigilan ang hoarding, profiteering, panic-buying, at iba pang posibleng kaguluhan.
Mahigpit na rin aniyang nakikipag-ugnayan ang PNP sa Department of Trade and Industry at mga lokal na pamahalaan para bantayan ang galaw ng presyo at suportahan ang mga inspeksyon.
Bilang karagdagang hakbang, nagsasagawa rin ng intelligence-driven operations ang PNP upang tugisin ang mga hoarder at sindikatong nagmamanipula ng presyo ng mga bilihin. — sa panulat ni Mark Terrence Molave
