Naka-heightened alert na ang Philippine National Police sa Metro Manila matapos ang magkakasunod na pambobomba sa Mindanao.
Ipinag-utos na ni National Capital Region Police Office Director, Maj. Gen. Felipe Natividad ang mas mahigpit na implementasyon ng security measures at pinaigting na police visibility sa Metro Manila.
Hinikayat naman ni Natividad ang publiko na huwag ma-alarma at iwasang mag-panic sa halip ay maging kalmado at alerto.
Maaari rin anyang isumbong ang mga kahina-hinalang tao at kanilang kilos sa pinaka-malapit na Barangay o Police Station.
Naganap ang Bus bombing sa Koronadal City, South Cotabato at isang bus terminal sa Tacurong, Sultan Kudarat na ikinasugat ng dalawa katao kamakailan.
Una nang inihayag ni PNP Officer-in-Charge, LT. Gen. Vicente Danao Jr. na posibleng extortion o pangingikil ang motibo sa mga pambobomba.